近排啲天氣忽冷忽熱咁，阿史身邊有唔少人都中晒招，史媽仲特登走去上環源吉林總鋪，買幾盒源吉林涼茶返屋企看門口。源吉林係百年老字號，每包涼茶由盒仔裝住，所以又叫做盒仔茶，主要有清熱、解暑、去感冒等功效，喺2003年SARS期間連存貨都賣斷晒，認真巴閉。

講起源吉林涼茶嘅歷史，要追溯到清朝道光年間，當時廣州三品大官源堯階嘅三個仔源會昌、合昌同埋英昌，喺佛山經營「三昌顏料店」。之後廣東佛山、南海一帶爆發瘟疫，源氏三兄弟見到貧苦大眾因為沒錢買藥而病死，就希望整一種價廉物美嘅藥賣俾平民。於是三兄弟就向名醫請教，研製出一種以「九蒸九曬」嘅古法程序煉製嘅茶葉，喺災區贈飲送藥，救治咗唔少人。當時南海獅山孔敬慎堂嘅父老，為咗讚揚源氏三兄弟嘅善舉，特登送咗一幅寫住「甘露和風」嘅牌匾俾佢哋，於是呢種特製茶又叫甘和茶。

1892年，源氏兄弟喺佛山鎮石雲山設藥廠，專門生產甘和茶。佢哋希望子孫後代吉祥如意，家族生意好似林木咁茂盛興旺，於是以「源吉林」為牌子，喺原本嘅顏料店開設專柜賣甘和茶。1906年，除咗佛山嘅顏料總店，源氏兄弟仲喺廣州同香港開設分店。源吉林曾經試過推出唔同產品，例如回春散、戒煙丸、婦科丸、如意油等成藥，但最後都係獨沽一味賣甘和茶。

原圖嚟自Yuen Kut Lam 源吉林facebook。